Steatoza hepatike

Çfarë është

Steatoza hepatike është grumbullimi i yndyrës në mëlçi. Forma më e shpeshtë lidhet me çrregullimet metabolike (mbipesha, diabeti, kolesteroli) dhe sot quhet sëmundja e mëlçisë e lidhur me disfunksionin metabolik (MASLD). Një formë tjetër shkaktohet nga alkooli. Te disa pacientë yndyra shoqërohet me inflamacion (steatohepatit), i cili me kohë mund të çojë në fibrozë dhe cirrozë.

Simptomat

Zakonisht nuk ka simptoma. Disa persona ndiejnë lodhje ose rëndesë në anën e djathtë të barkut. Shpesh zbulohet rastësisht nga ekografia ose nga transaminazat (ALT, AST) e rritura.

Faktorët e rrezikut

• mbipesha, sidomos yndyra në bark
• diabeti tip 2 dhe rezistenca ndaj insulinës
• trigliceridet e larta
• alkooli
• jeta sedentare dhe pijet e ëmbla

Diagnoza

Gastro-hepatologu vlerëson analizat e mëlçisë, ekografinë abdominale dhe rrezikun për fibrozë (me indekse të llogaritura nga analizat, dhe kur duhet me elastografi). Përjashtohen shkaqet e tjera: hepatitet virale, barnat, sëmundjet e tiroides.

Trajtimi

Trajtimi kryesor është ulja e peshës: humbja e 7–10% të peshës trupore ul ndjeshëm yndyrën dhe inflamacionin në mëlçi. Ndihmojnë ushqimi mesdhetar, ulja e sheqernave dhe pijeve të gazuara, aktiviteti fizik të paktën 150 minuta në javë dhe shmangia e alkoolit. Diabeti dhe kolesteroli trajtohen njëkohësisht.

Kur të shkoni te mjeku

• kur ekografia ka treguar steatozë hepatike
• kur ALT ose AST janë mbi normë
• kur keni diabet tip 2 ose mbipeshë të theksuar, edhe pa ankesa